2018 жылғы 22 ақпанда Мұнай-газ ақпараттық ресурстар залында жазушы Айгүл Серікбайқызының «Жұлдызды жолдың сардары» кітабының кейіпкері жазушы-фантаст Жүніс Сахұрпағымен кездесу өтті.
Жүніс Сахиев (Жүніс Сақұрпағы) 1950 жылы 1 наурызда дүниеге келген. Әкесі Сақ оқымысты, анасы Құлханыс әңгімешіл зерек кісі болған. Телеграфшы, жазбагер мамандығының иесі. Елімізде авторлық «Кеңістік көшпенділері» сериялы ғылыми-болашақтық романдарды алғаш бастап жалғастырып жазып келеді. Бүгінгі күнге дейін «Тіршілік ұясы» (әңгімелік нұсқасымен), «Борыш» (повестік нұсқасымен), «Шеңбердің түйісуі» (повестік нұсқасымен), «Көктен келген көшпенділер», «Марстан шыққан жаңғырық», «Қимайтын әлем», «Шолпанға көшкен ауыл», «Космотарих куәсі», «Су әлемінің саздары», «Жасампаздық қиырында», «Ғарыштан келген гүл», «Күзетші» ғылыми-болашақтық романдары, «Астрономия» энциклопедиясы, өмірі мен шығармашылық жолы жөнінде «Жұлдызды жолдың сардары» монографиясы, «Жүніс Сақұрпағы, Жунис Сахиев, Zhunis Sakurpagy» биобиблиографиялық көрсеткіш жарыққа шықты. Қазақстан Жазушылар одағы әдеби, Халықаралық Байқоңыр сыйлықтарының лауреаты, бұрынғы КСРО Ғылым академиясы Астрономия-геодезия қоғамының толық мүшесі – академигі. Шығармашылық өмірбаяны көптеген ірі энциклопедиялық басылымдарға енген. Кездесу аясында Жүніс Сахұрпағының еңбектерінен кітап көрмесі қойылды.
|