2018 жылғы 25 мамырда Н.Дәулетова атындағы  залда   ақын, халық жазушысы, журналист Фариза Оңғарсынова жайлы жазылған естеліктер жинағының тұсаукесер рәсімі өтті.

   Бұл естелік кітап – Мемлекеттік сыйлықтың лауреаты, халық ақыны Фариза Оңғарсынованың өміріне арналған.
   Естелік кітапта ақындығы арқылы өз жүрегін қалың оқырман жүрегіне жалғап өткен Фариза туралы  замандастары, әріптестері, достары оның адамдық тұлғасы, қайраткерлігі, қамқорлығы, қайсар мінезі, ешкімге ұқсамайтын дара жаратылысы туралы жазылған. Кітаптың құрастырушысы белгілі журналист Гүлсім Оразалықызы. 
   Іс-шараның модераторы - жазушы, журналист, Қазақстанның Жазушылар одағы Басқарма төрағасының орынбасары Мереке Құлкенов Әбдешұлы болды. Сондай-ақ шараға Сәбит Оразбаев, Әлия Бейсенова, Маралтай Ыбыраев, Ғазиза Әбдінәбиева сынды белгілі мәдениет және өнер қайраткерлері, ақын туыстары қатысып, естеліктерімен бөлісті. әл-Фараби атындағы ҚазҰУ студенттері ақын поэзиясынан өлеңдер оқып, ән шырқады.