2018 жылғы 30 мамырда, 31 мамыр – Саяси қуғын-сүргін құрбандарын еске алу күніне орай, тұңғыш қазақстандық скрипкашы, Түркістан легионы фашистік концлагерь тұтқыны Әйткеш Толғанбаевтың өміріне арналған «Қатал тағдыр тәлкегі» атты кітаптың тұсаукесер рәсімі өтті. 

   Бұл кітапта фашистік және большевиктік лагерь тұтқыны  Әйткеш Толғанбаевтың басынан кешірген оқиғалары жазылған. Ол Отанын сатқан жоқ, туған халқына, еліне қарсы зиянды әрекеттерге бармады, от пен оқтың, өмір мен өлімнің небір адам төзбейтін қиындықтарын тарта жүріп, өмір үшін күресті. Оның өмір жолы – ерліктің, қайсарлықтың, адалдықтың, азаматтықтың үлгісі.
   Іс-шараға Саяси қуғын-сүргін құрбандары өкілдерінің ұрпақтары, Азаматтық Авиация академиясы мен «Аяжан» медициналық колледжінің студенттері, оқырмандар мен БАҚ өкілдері қатысып, Әйткеш Толғанбаевқа арналған өлең жолдарын оқыды.