2018 жылғы 3 шілдеде Алматы қаласы Жастар саясаты мәселелері жөніндегі басқармасының және ҚР Ұлттық кітапханасының қолдауымен, Астананың 20 жылдығын мерекелеу аясында бірінші FOYA жас суретшілер фестивалінің ашылуы өтті.
FOYA фестивалі Қазақстандағы алғашқы толықтырылған шындық элементтері бар картиналар көрмесінен басталды. Көрермендер өнерді тек көзбен көріп қана қоймай, өздерінің гаджеттері арқылы суреттермен байланысу мүмкіндігіне ие болды. Осы мақсатта Жас суретшілер орталығы программистермен бірлесіп, өнердегі цифрлаудың тәжірибелік құралы болып табылатын және өнер объектілерін «жандандыратын» «Өнер up» қосымшасын жасап шығарған. Көрме екі кезеңге бөлінді: галереяның ашық бөлігі алты негізгі өнер объектілерінен құралды. Ондағы картиналар әртүрлі стилистикалық құралдар мен суреттер арқылы Астана қаласының келбеті мен қырларын көрсетті. Ал жабық галереяда әртүрлі техникамен жасалынған картиналар болды. Олардың әрқайсысында жеке тарих, адамдар, махаббат және өмір туралы бейнелер көрсетілген. Сондай-ақ фестивалдің ашылуында классикадан street art өнеріне дейінгі туындылары ұсынылды. Көрменің қатысушылары: танымал жас суретшілер Repas, Shaman Neon, Pamamurty, Tig crew, Алмаз Нұрғожаев, Бақыт Сейсенханұлы, Арайлым Қуаныш және т.б. болды.
|