Мерзімді басылымдар оқу залында «Балдырған» әдеби-көркем журналының 60 жылдығына арналған көрме ұйымдастырылды.
«Балдырған» - бастауыш сынып балаларына арналған әдеби - көркем журнал. Журнал 1958 жылы шілдеден бастап қазақ тілінде айына бір рет шығарылады. Алғашқы редакторы (1958- 1986ж.ж) қазақтың белгілі ақыны Мұзафар Әлімбаев болды. Журналдың дамуына қазақтың көрнекті жазушылары Бердібек Соқпақбаев, Қадыр Мырзалиев, Әнуарбек Дүйсенбаевтар үлкен үлес қосты. 1986 жылдары «Балдырған» журналының бас редакторы Қазақстанның халық жазушысы Тұманбай Молдағалиев болды. Қазіргі уақытта журналды Дүйсен Мағұлұмов басқарады. Алғашқы санынан бастап қазақ балалар әдебиетінде еңбек сіңірген жазушылар: С.Бегалин, Ө.Тұрманжанов, С.Омаров, М.Зверев, Б.Соқпақбаевтар журналдың тұрақты авторлары болды. Сонымен қатар, шетел жазушыларының таңдаулы туындылары да журнал бетінде жарияланып тұрды. 1962 жылы республикамыздың баспа органдары «Балдырған» бетінде жарияланған шығармалардан құрастырып, «Балдырған базарлығы», «Бөбектерге тарту», «Тақпақ айтып, ән шырқайық», «Мектеп әндері», «Балдырғандар жыры» атты алты жинақ шығарды. Журнал тек көркем шығарма жариялаумен ғана емес, сондай-ақ, өз оқушыларын табиғат құбылысының құпия сырларымен, ғылым және техниканың соңғы жаңалықтарымен де таныстырып отырды. Журнал шыққан күнінен бастап әртүрлі жастағы оқырмандардың сүйіспеншілігіне ие болды. Журнал бетіндегі жарияланған мақалалар сөздік қорын жетілдіріп, өлең-тақпақтар, ертегі-аңыздар, жаңылтпаштар мен жұмбақтар балалардың ой-өрісін кеңейтті. Балалардың өлеңдері, сызбалары мен жазбалары оқырмандардың өмірдегі мақсаттары туралы ойлауға, болашақ мамандықтарын таңдауға көмектеседі. Журналдағы әртүрлі пайдалы ақпараттарды балалар мен мектеп мұғалімдері қуана оқиды. Көрмеге Қазақстан Республикасы Ұлттық кітапханасының қорынан мерзімді басылымдар беттеріндегі танымал жазушылар мен журналистердің мақалалары ұсынылған.
Сіздерді көрмеге шақырамыз!
|