2018 жылғы 12 желтоқсанда  Н.Дәулетова атындағы залда филология ғылымдарының докторы, профессор Айгүл Ісімақованың «Алаш әдебиеттануы» атты кітабының тұсаукесері өтті.

   Іс-шараны ҚР Ұлттық кітапханасы директорының кітапханалық жұмыстары жөніндегі орынбасары Б.Қ.Оспанова ашты.
   Айгүл Мұхаммедсерікқызы Ісімақова - М.О.Әуезов атындағы Әдебиет және өнер институтының бас ғылыми қызметкері, Қазақстан Жазушылар одағының мүшесі. Ол Америка биография институтының «Ғылым адамы - 2004» сыйлығының және Ахмет Байтұрсынұлы атындағы «Саңлақ автор» медалінің иегері.
   Әдебиеттанушы А.Ісімақованың «Алаш әдебиеттануы» атты еңбегі  ХХ ғасырдың басындағы Алаш әдебиеті мен қазақ әдебиеттану ғылымының ұлттық көркемсөз өнерін зерделеуге арнаған. Онда қазақтың асыл сөзін қастерлеген ата-баба мұралары қашаннан басталғандығы, Алаш әдебиеттану ұғымының қалай қалыптасқандығы жөнінде туындайтын сауалдарға жауап беріледі. Сонымен қатар, кітапта Алаш ғалымдарының жалпы ғылымға қандай үлес қосқандығы, Алаш ғылыми мұрасы несімен құнды болатыны жан-жақты талданды.
   Іс-шарада  шығыстанушы, дінтанушы Әбсаттар Дербісәлі, филология ғылымдарының докторы Жанғара Дәдебаев, Уәлихан Қалижанов, Жұмабай Шаштайұлы, Зейнолла Бисенғалиев, Дандай Ысқақ, Жадыра Тойбай сөз сөйледі.
   Шараны филология ғылымдарының докторы Кенжехан Матыжанов жүргізді.
   Іс-шараға белгілі қоғам және мәдениет қайраткерлері, БАҚ өкілдері және оқырмандар қатысты.