2018 жылғы 21 желтоқсанда Almaty Arena көпфункционалды спорт кешенінде Халықаралық «Titan FC» ұйымы және «Alem fighters» спорт клубының ұйымдастырумен аралас жекпе-жек (ММА) бойынша «Titan FC 51» Халықаралық турнирі өтті.
UFC сапына кіруге жол ашатын бұл әлемдік додаға 15 мемлекеттен - Қазақстан, Бразилия, Қытай, АҚШ, Канада және т.б. елдердің мықты спортшылары күш сынасты.
Осы спорттық жарысқа орай, Қазақстан Республикасының Ұлттық кітапханасында 19 желтоқсанда жекпе-жек алдындағы ашық жаттығу жұмыстары және 20 желтоқсанда салмаққа түсу рәсімі мен баспасөз конференциясы өтті. Іс-шараны ұйымдастырушы ережесіз жекпе-жектен үш дүркін әлем чемпионы, «Alem fighters» кәсіпқой спорт клубының жетекшісі Ардақ Назаров. Конференцияға «Titan FC» тұжырымының президенті Лекс Макмахон, әлем чемпиондары Бейбіт Назаров және Қазыбек Әшімов, ММА-дан үш дүркін әлем чемпионы, бразилиялық Джезиас Кавальканте қатысты. Сонымен қатар, жарыс қонағы ретінде АҚШ-тан UFC чемпиондары Стефан Стрюве, Камару Усман және Гилберт Бернс келді. Файткард құрамына екі титулды жекпе-жек кірді. Жеңіл салмақтағы чемпиондық белбеуді (57 келі) колумбиялық Хуан Пуэрта (15-6) мен қазақстандық спортшы Қазыбек Әшімов (13-3) сарапқа салса, бұл кештің басты жекпе-жегінде Бейбіт Назаров (14-3) пен Мартин Браун (12-5) кездесті. Олар жеңіл салмақта (70,3 кг) уақытша чемпиондық белбеуіне таласты. Қазақстан Республикасының Ұлттық кітапханасы аталған шара аясында спорт жетістіктеріне арналған «Спорт әлемі» атты кітап көрмесін және Ұлттық қолөнер бұйымдарының көрмесін ұйымдастырды.
|