2018 жылғы 14 желтоқсанда Кітапханатану залында Қазақстан Республикасының Тәуелсіздік күніне орай, Ұлттық кітапхана қызметкерлеріне арналған «Еліміздің еркіндігі - Тәуелсіздік» атты мерекелік кеш өтті. Мерекелік кешті ҚР Ұлттық кітапханасы директорының ғылым жөніндегі орынбасары А.Х.Юсупова ашып, Тәуелсіздік мерекесімен құттықтады. 16 желтоқсан – ата-бабамыздың арманы орындалып, жасампаздығымызды жаңа белеске көтерген Тәуелсіздік күні. 1991 жылғы 16 желтоқсанда Президент Нұрсұлтан Назарбаев қол қойған Конституциялық Заңнан бастау алған тәуелсіздігімізге биыл 27 жыл толды. Бұл күн – ата-бабамыздың аңсаған арманы жүзеге асқан, елімізге еркіндік сыйлаған Ұлы күн. Халқымыздың ынтымағы, ұлтаралық татулығы мен жасампаздығы елдігіміздің баға жетпес құндылықтары. Іс-шарада Көрмелер және мәдени бағдарламалар бөлімінің қызметкері Таңжарық Орманбеков «Желтоқсан желі», «Елім менің» әндерін орындап, кітапхананың жас мамандары Жандос Қанатұлы, Дархан Сағындықов, Үміт Ерқанат Тәуелсіздік күніне арналған өлеңдер оқыды. Іс-шара аясында Қазақстан Республикасының Тәуелсіздік күніне арналған кітап көрмесі ұйымдастырылды.
|