2018 жылғы 19 желтоқсанда Н.Дәулетова атындағы залда Ш.Уәлиханов атындағы Тарих және этнология институтының ұсынуымен Ә.Бөкейхан. Шығармалары – Сочинения. 15 том. – Астана: «Алашорда» Қоғамдық қоры, 2018. – қазақша, орысша жинағының және «Әлихан Бөкейхан» тұлғалық энциклопедиясының тұсаукесер рәсімі өтті.

   Әлихан Бөкейхан шығармаларында әр жылдары қазақ және орыс тілдерінде жарық көрген мақалалары, ғылыми зерттеулері, 1897-1901 жж. Қазақ облыстарын зерттеген «Щербина экспедициясының» материалдары, Л.Н.Толстой шығармаларынан аударған әңгімелері, өтініштері, хаттары және хаттамалары қамтылған.
   «Әлихан Бөкейхан» тұлғалық энциклопедиясына Ә.Бөкейханның өмірбаяндық деректері, қайраткерлік қызметі, ғылыми, публицистикалық, аударма мұралары туралы мақалалар енгізілген. Кітапта Алаш қозғалысына қатысты мағлұматтар, Алаш қайраткерлерінің өмірбаяндары, сондай-ақ ғалым жөнінде жазылған еңбектер мен олардың авторлары туралы да мәліметтер берілген.
   Іс-шараны Ш.Уәлиханов атындағы Тарих және этнология институтының директоры, т.ғ.д., профессор Зиябек Қабылдинов жүргізді.
   Шараға ҚР ҰҒА академигі, т.ғ.д., профессор Мәмбет Қойгелді; т.ғ.д., профессор Уахит Шалекенов; ғалым, Л.Н.Гумилев атындағы ЕҰУ «Алаш ғылыми - зерттеу институтының директоры Сұлтан Хан Аққұлұлы Жүсіп; филология ғылымдарының докторы Орынай Жұбаева және т.б. қоғам және мәдениет қайраткерлері қатысып, сөз сөйледі.