2019 жылғы 23 қаңтарда Н.Дәулетова атындағы залда жазушы, драматург, ҚР Еңбек сіңірген қайраткері, Қазақстан Жазушылар одағы және Әлем халықтары Жазушылары одағының мүшесі Ахметжан Аширидің 80-жылдығына арналған шығармашылық  кеш  өтті.
    Іс-шараны ҚР Ұлттық кітапханасының директоры Ж.Сейдуманов ашып, А.Ашириге «vip» оқырман билетін табыстады.
  Ахметжан Ашири 1938 жылы 20 тамызда Алматы облысы Шелек ауданының Малыбай ауылында туған. Панфилов педучилищесін, Қазақ мемлекеттік университетінің филология факультетін бітірген. Ы.Алтынсарин атындағы педагогикалық ғылыми-зерттеу институтының аспирантурасында оқыған. Ол Республикалық «Коммунизм туғи» газеті әдебиет және өнер бөлімінің меңгерушісі, Қазақстан Жазушылар одағының жанындағы ұйғыр әдебиеті секциясының жетекшісі, Қазақстан Жазушылар одағының хатшысы болды. Көркем шығармамен 1956 жылдан айналыса бастайды. Оның алғашқы әңгімелері «Таңғы самал», «Қилы адамдар» жинағына енді. Ал 1965 жылы ауыл жастарының өміріне арналған «Осылай өмір сүргім келеді» атты тұңғыш повесі жарық көрді. Шығармалары орыс, қазақ, өзбек, украин, қырғыз тілдеріне аударылған. «Өлмейтіндер», «Муқамшы», «Диқан», «Идиқұт»  пьесалары республикалық ұйғыр музыкалық комедия театрында қойылып келеді.
   Іс-шараға Бауыржан Жақып, Сұлтанәлі Балғабаев, Жанарбек Әшімжан, Ахметжан Шардинов, Нұрдәулет Ақышев, Әлімжан Тілеуалды, Рафаэль Ниязбек, Темірхан Тебегенов, Қайрат Дүйсен және т.б. қоғам  қайраткерлері  қатысып, сөз сөйледі.
    Кеште ұйғыр тілінде әндер орындалып, А.Ашириге арналған бейнеролик  көрсетілді. Сондай-ақ, оқырман қауымның назарына ҚР Ұлттық кітапханасының қорынан жазушының өмірі мен шығармашылығына арналған көрме ұйымдастырылды.
    Іс-шараны ақын, Қазақстан Жазушылар одағының мүшесі Дәулетбек Байтұрсынұлы жүргізді.