2019 жылғы 25 қаңтарда Әлем әдебиеті залында Қазақстан Республикасындағы Ресей ынтымақтастығы өкілдігінің және Алматы қаласындағы Ресей Федерациясы Бас консулдығының Ресей кітап бұрышына жыл сайынғы, дәстүрлі кітаптарды сыйға тарту рәсімі өтті. 
    Ресей кітап бұрышына дәстүрлі жаңа кітап топтамаларын жыл сайын табыстау рәсімі Ресейде студенттік күн ретінде атап өтілетін қасиетті Татьяна күні қарсаңында өтті.                                              
    Кітапхана қорына  жүзден аса басылым сыйға тартылды. Оның ішінде: «Русская культура», «Школьная библиотека», «Классная классика», «История. Достопримечательности. Традиции» кітап топтамалары, әйгілі кинорежиссер С.А.Соловьевтың актерлар: В.Тихонов, А.Абдулов, Т.Друбич, О.Янковский, И.Смоктуновский туралы «Те с которыми я…» атты кітап топтамасы бар. Ұлы балетмейстер және театр саңлағы Мариус Петипаның туғанына 200 жыл толуына арнайы басылып шығарылған кітап сыйға берілді. 
     Іс-шарада ҚР Ұлттық кітапханасының директоры Ж.Т. Сейдуманов, Алматы қаласындағы Ресей Федерациясы Бас консулдығының Бас консулы Е.П. Бобров, Қазақстан Республикасындағы Ресей ынтымақтастығы өкілдігінің және Алматы қаласындағы  Ресей Федерациясы Бас консулдығының консулы И.В.Переверзева сөз сөйледі. Іс-шараға кеш конақтары және кітапхананың тұрақты оқырмандары қатысты,  олар Алматы қаласындағы Ресей Федерациясы Бас консулдығына өздерінің ұсыныстары мен жылы лебіздерін білдірді.