2007 жылдың 11 сәуірінде Қазақстан Республикасы Үкіметінің 2007 жылғы 21 ақпандағы № 32-Р Республикалық деңгейде атап өтетін мерей той даталары жөніндегі өкіміне сәйкес Қазақстан Республикасының Мәдениет және ақпарат министрлігі мен ҚР Ұлттық кітапханасы қазақтын аса көрнекті ақыны Ғ.Ормановтың 100 жылдығына орай ақынның өмірі мен шығармашылығына арналған көрме және оқырмандармен конференция өтеді.

    Ғ.Ормановтың алғашқы өлендері 1928 жылдан баспа жүзінде шыға бастады. Тұңғыш өлендер жинағы «Шеңбер» деген атпен 1934 жылы жарық қөреді. «Шәуілдір» (1934), «Алынған қамал» (1935) поэмалары,  «Абысын сыры» (1936) жыр кітабы, «Көтерме», атты прозалық жинағы  (1935)  жарыққа шықты. «Өмір дастаны» (1948), «Бөбек жүрегі» (1949), «Сәт сапарда» (1957), «Ой қанаты» (1961),  «От өзен» (1965), «Жер қазығы» (1972), «Жыр қанаты» (1975),  «Жылдар жыры» (1976), т.б. өлең жинақтарында әлеуметтік оқиғаны суреттеуде ақындық шеберлік танытты.

    Ұлы Отан соғысы жылдары ақын «Халық - қаһарман» (1941), «Емен» (1944) деген өлеңдер жинағын ұсынды. Ақынның шұрайлы өлеңдері 1950 жылы шыққан Таңдамалы шығармалар жинағына енді. 1957 жылы Ғ.Ормановтың таңдамалы шығармалары жеке кітап болып шықты.  

   Өмірінің соңғы жылдарында Ғ.Ормановтың қаламынан тағы да бірқатар өлеңдер мен поэмалар туды.

   Ғ.Орманов, А.С.Пушкинің, М.Ю.Лермонтовтың, В.В.Маяковскийдің, Л.Соболевтің, Н.Тихоновтың, Ян Райнистің бірқатар шығармаларын, Л.Н.Толстойдың «Анна Каренина», романын, Н.В.Гогольдің «Нева проспектісі», А.П.Чеховтың бірінеше әңгімелерін, М.Бубенцовтың «Ақ қайың романын», М.Тұрсын-Заденің «Үндістан балладалары» өлең кітабын қазақ тіліне аударды.

   Осы іс-шара шеңберінде «Майталман лирик» атты кітап көрмесі ұйымдастырылады.

  Конференцияға ақынның қызы, көрнекті мәдени-қоғам қызметкерлері, зиялы қауым, жазушылар, студент-жастар қатысады.