2008 жылдың 1 қазанында Қазақстан Республикасының Ұлттық кітапханасы мен Мәдени саясат және өнертану институты «Домбыра ­- әлемдік мәдениеттің ғаламат құбылысы» тақырыбында форум және Ж.Нәжімеденовтің «Қоңыр үнді домбыра» атты үш тілде жарық көрген кітабының тұсаукесерін өткізді.

     Форум өткізудегі мақсат – ұлттық мәдениетті еуропалық мәдениетке қасиетті құндылықтарымыздың бірі – домбыра арқылы таныту, домбыра аспабы арқылы бренд қалыптастыру, домбыраның Еуразия халықтары үшін ежелгі көшпенділер мәдениеті мен тарихын қазіргі заманға жеткізуші қайталанбас аспап ретіндегі құндылығын бағалау, домбыраны әлемдік мәдени құндылықтар тізіміне енгізуге қажетті нормативті-құқықтық актілердің негізін жасау.

     Форумға ҚР Мәдениет және ақпарат министрлігінің өкілдері және Орта Азиядағы ЮНЕСКО-ның өкілі Тария Виртанин, көрнекті ғалымдар, белгілі қоғам және мәдениет қайраткерлері А. Кетегенова, Ш. Әбілтаев, Р.Отарбаев, Д.Исабеков және басқалар қатысты.

    Форум жұмысы барысында ҚР Ұлттық кітапханасының қорынан «Қоңыр үнді домбыра» атты кітап көрмесі ұйымдастырылды.