2008 жылдың 1 қазанында Қала күні мерекесіне орай Қазақстан Республикасының Ұлттық кітапханасы мен Алматы қаласының әкімшілігі бірігіп «Мәдени мұра» бағдарламасы аясында «Жалпыұлттық кітап қорына түскен жаңа жазба деректер» атты көрме өткізді.

    «Мәдени мұра» Мемлекеттік бағдарламасы аясында ҚР Ұлттық кітапханасының мамандары 2004 жылдан бері Батыс Еуропа елдерінің кітапханалары мен мұрағаттарында ғылыми-ізденіс жұмыстарын жүргізуде. Жұмыс барысында Қазақстан үшін тарихи-мәдени құндылығы бар көптеген жазба ескерткіштер Ұлттық кітапханасының қорына алынды. 2007 жылғы экспедиция барысында бұрын қазақстандық тарихшылардың қолы жетпей келген көптеген құнды құжаттар мен материалдар әкелінді. Соның ішінде Қазақстан мен ТМД елдерінде жоқ араб әрпімен жазылған қазақ кітаптарының 30 аталымы бар. Қазақстан үшін табылған құжаттар деректанулық тарихи ескерткіш ретінде бағаланады.

    Көптеген материалдар мен құжаттар Қазақстан Республикасы Ұлттық кітапханасының қорын толықтыра отырып, таяу арада қазақстандық оқырмандардың және зерттеушілердің игілігіне айналмақ.