2008 жылдың 26 желтоқсанында сағат 11-30-да Қазақстан Республикасының Ұлттық кітапханасында  Қазақстан Республикасы Білім және ғылым министрлігі М.О.Әуезов атындағы Әдебиет және өнер институты мен «ҚазАқпарат» баспа корпорациясы «Мәдени мұра» мемлекеттік бағдарламасы бойынша жарық көрген он томдық «Қазақ әдебиетінің тарихының» және  бес томдық «Қазақ музыкасының антологиясының» тұсаукесер рәсімін өткізді.

     Он томдық «Қазақ әдебиетінің тарихын» шығаруға академик С.Қасқабасов бастаған Әдебиет және өнер институты, көптеген ғалымдар мен мамандар, жекелеген авторлар қатысты. Соның нәтижесінде үш жыл ішінде аталмыш шығарылым ел игілігіне айналып отыр. Білікті ғалым, профессор С.Күзембаева жетекшілігімен дайындалған «Қазақ музыкасының антологиясының» да ел игілігіне айналатын күні алыс емес.

     Тұсаукесер рәсіміне М.О.Әуәзов атындағы Әдебиет және өнер институтының директоры, ҚР ҰҒА академигі С.А.Қасқабасов, «ҚазАқпарат» баспа корпорациясының президенті Қонысбек Ботбай, өнертану ғылымдарының кандидаты, профессор С.Күзембаева, ҚР Ұлттық кітапханасының бас ғылыми хатшысы Е.И.Исмаиловтар қатысты.

    «ҚазАқпарат» баспа корпорациясы ҚР Ұлттық кітапханасына және 19 қалалық кітапханалардың қорына өздерінің басып шығарған кітаптарын сыйға тартты.