2009 жылдың 4-маусымында ҚР Ұлттық кітапханасының Мәдени бағдарламалар орталығында педагогика ғылымдарының докторы, математика профессоры, Халықаралық жоғары мектеп академиясының академигі, Қазақстан Республикасының еңбек сіңірген қайраткері Закириянов Қайрат Қайроллаұлының «Шыңғысханның түркілік ғұмырнамасы» атты кітабының тұсаукесері өтті.
«Шыңғысханның түркілік ғұмырнамасы» кітабында Шыңғысхан мемлекетінің құрылуы, Шыңғысхан әулетінің генетикалық мұрасының мәселелері талданады, Түркі қағанаты кезеңіндегі моңғолдар тарихының мәселелері қарастырылады. Шыңғысхан мемлекеті мен Қазақстан тарихы арасындағы өзара байланыс сараланып дәлелденеді. Ру таңбаларының шығу тарихы ғылыми тұрғыдан түсіндіріледі.
Сонымен қатар осы кітап беттерінде ғалым Қайрат Закириянов қазақ халқының тұрғылықты мекені, басқа халықтармен және өркениеттермен байланысы, халық болып қалыптасу жолындағы жеңістері мен жеңілістері мәселелерін қарастырады. Автор қазақ ұлтының қазіргі Қазақстан территориясында қалыптасу мәселелерін саралайды. Кітап осы еңбекте Шыңғысхан мемлекеті мен Қазақстан тарихының жаңа белгісіз беттерінің ашылуымен ерекшеленеді.
Тұсаукесерге академиктер О.Смағұл, С.Аманжолов, профессор С. Байболовтар, танымал жазушы Қ. Ысқақ, сондай-ақ журналистер мен кітапхана оқырмандары қатысты.
|