ҚР Ұлттық кітапханасының Мәдени бағдарламалар орталығында белгілі демограф, саясаттану ғылымдарының докторы М.Б. Тәтімовтың «Елбасы және ел саны» атты кітабының тұсаукесері өтті. Бұл шара автордың қатысуымен, «Арыс» қорының баспасымен бірлесіп ұйымдастырылды.
Кітап “Ұлт Перзенті – Ұлыс Президенті”, “ Ұрпақтар қалай ұласқан?», «Болашаққа аманат” деп аталатын үш бөлімнен тұрады. Бірінші бөлімде автордың еліміздің тұңғыш Президенті Н.Ә. Назарбаевпен Украина жерінде бірге өткізген студенттік жылдары, Елбасының адамдық болмысы, қайраткерлік келбеті, бүгінгі қоғамымыз жайындағы ой-пікірлері ғалым, журналист Ғ.Әнеспен сыр-сұхбат түрінде өрбиді. Одан кейінгі бөлімдерде халқымыздың демографиялық жағдайы, өсіп-өнуі, даму кезеңдері туралы нақты деректер, кестелер, болжамдар келтірілген.
Осы тұсаукесер аясында «Арыс» қорының баспасы өзінің соңғы жылдарда шығарған кітаптарының кеңейтілген көрмесін ұсынды. Олардың қатарында анықтамалық, ғылыми-танымдық, тарихи, медициналық, көркем әдебиеттер мен оқу құралдары бар. Көрмеге қойылған барлық кітаптар ҚР Ұлттық кітапханасының қорына сыйға тартылды.
Тұсаукесерге ҚР Ұлттық кітапханасының Бас директоры О.И.Исахов, «Арыс» қорының президенті Ғ.Әнес, кітап авторының студенттік шақтағы достары Т.Исаев, З.Имандинов, шәкірті Ә.Ғали және БАҚ өкілдері, республикалық, қалалық кітапханалардың қызметкерлері қатысты. Кітапханалар қорына, шараға қатысушыларға автор өз кітабын сыйға тартты. |