Қазақстан Республикасы Ұлттық кітапханасының Бас директоры Орынбасар Исахов Кореяның Донгук университетінің құрметті профессоры Хон Юнг Сик бастаған Кореяның шет елдердегі мәдени мұрасы жөніндегі Сеул комитетінің делегациясын қабылдады.

Кездесудің мақсаты − Қазақстан Республикасы Ұлттық кітапханасының сирек кітаптар мен қолжазбалар қорының негізінде жасалған кәріс тіліндегі сирек кітаптар каталогын  табыстау. Делегация құрамында Сеул қалалық кеңесі спикерінің орынбасары Боо Доо Ван, Будда Ассоциациясының бас хатшысы Ли Санг-Гун, ақындар мен журналистер болды.

Каталог Қазақстан Республикасының Ұлттық кітапханасы мен Кореяның шет елдердегі мәдени мұрасы жөніндегі Сеул комитетінің арасында 2005 жылы  қол қойылған шартқа сәйкес жасалып, шығарылған болатын. Каталогта көне кәріс тіліндегі 436 аталым еңбек бар. Кездесу барысында осы каталогты қазақ, орыс және ағылшын тілдеріне аударып шығару  туралы мәселе, сондай-ақ ТМД елдерінде соңғы жылдары шыққан Корея  және кәрістер туралы кітаптардың көрмесін ұйымдастыру және оларды соңынан  Қазақстан Республикасының Ұлттық кітапханасына табыстау мәселесі талқыланды.