ҚР Ұлттық кітапханасында Әлихан Бөкейханның 7-томдық толық шығармалар жинағының алғашқы 3 томының тұсаукесері (таныстырылымы) өтті. Аталған жинақтың алғашқы І, ІІ және ІІІ  томдары өткен жылдың соңында Астана қаласындағы «Сарыарқа» Баспа үйінен жарық көрді. 

Алғашқы 3 томға ғалым әрі қайраткердің 1889 жылмен 1913 жыл аралығында қазақ және орыс тілдерінде жарық көрген мақалалары, хаттары, әдеби аудармалары, ғылыми зерттеулері кірген. Олардың көбісі бұрын беймәлім болып келді. Қалған 4 томы 2010 жылы жарық көреді.

Толық шығармалар жинағын құрастырған Сұлтанхан Аққұлұлы. 1995 жылы Қазақ энциклопдясынан жарық көрген «Ә.Н.Бөкейхан. Таңдамалы – Избранное» жинағын да құрастырған С.Аққұлұлы болатын.

Ә.Н.Бөкейхан – ғұлама ғалым, публицист әрі көрнекті мемлекет қайраткері – қазақтың 20-ғасыр басындағы «Алаш» ұлттық қозғалысының көсемі, Алашорда ұлттық-территориялық автономиясы төрағасы.

Тусакесер рәсіміне белгілі қоғам қайраткерлері мен ғалымдар, Ә.Бөкейханның, Н.Нұрмақовтың, О.Жандосовтың  ұрпақтары және жұртшылық өкілдері қатысты.